Hiemside Ynterfryske Rie.

Fan woansdeite(nei)middei 11 oktober oant en mei sneontemoarn 14 oktober 2006 hat der wer in Ynterfryske moeting fan gemeentebestjoerders west.

Nei de suksesfolle byienkomst yn Ihlow en Westoverledingen yn oktober 2004 hat in tal dielnimmers út Fryslân, ûnder lieding fan Bearn Bilker de moeting yn Westerlauwersk Fryslân organisearre.

Diz’ kear yn de gemeenten Ljouwert en Littenseradiel.

Om it tema fan dizze moeting “WETTER “ wiene lêzings en ekskurzjes. It programma foar de Ynterfryske moeting 2006 fine jo hjirûnder.

De twajierlikse Ynterfryske moeting is in inisjatyf fan de Fryske Rie en de Sektion Ost des Interfriesischen Rates. Sy stellen har ta doel om it kontakt tusken maatskiplike organisaasjes en oerheden yn de trije Fryslannen te befoarderjen.

Programma Bestjoerdersmoeting 11 oktober o/m 14 oktober ‘06

Woansdei 11 oktober.

Oankomst yn Hostel Stayokay, Grou, oant 18.00 oere.

Fan 19.00 oere ôf in mienskiplik miel; folge troch in gesellich byinoarwêzen, mei û.o. útlis oer it fierljeppen.

Tongersdei 12 oktober.

Nei it moarnsbrochje, om 8.oere, mei eigen ferfier nei it stasjon fan Grou. Mei de trein nei Ljouwert (sa’n 15 minuten). Te gean nei it Van Hallinstituut, dêr set om 10.00 oere in lêzing útein oer de nijste techniken oangeande

WETTER

Dêrnei folget in rûnlieding yn it laboratorium .

It moarnsprogramma duorret oant 12.00 oere.

Te gean nei it Provinsjehûs foar it middeisiten.

Wolkom troch de Kommissaris fan ‘e Keninginne drs. E.H.M.T. Nijpels.

It tema WETTER sil dan ek oan ‘e oarder komme .

Om 14.30 oere ôfskied fan de Provinsje foar in histoaryske stedskuier in trije groepen troch Ljouwert dy’t om 16.30 oere útkomt yn de Prinsetún. Nei in sûpke werom mei de trein nei Grou.

Om 19.00 oere in waarm buffet, folge troch in jûnsprogramma fan 20.30 oere ôf.

Boargemaster mr. R.S. Cazemier fan de gemeente Dongeradiel hâldt in ynlieding oer De Waadsee en boargemaster drs. J. Liemburg fan de gemeente Littenseradiel fertelt i tien en oar oer it tastânkommen fan de histoaryske Middelseerûte.

Freed 13 oktober.

Nei it moarnsbrochje om 8.00 oere om 9.00 oere mei de bus fia Skearnegoutum nei Boazum foar in kuier troch it terpdoarp. Ien fan de wichtichste en moaiste Romaanske tsjerkegebouwen fan Fryslân út de 12^e ieu, mei in prachtige fresko fan de burdleaze Kristus, wurdt besocht. Dan kofje yn it doarpskafee Boazumermjitte.

Om 10.45 oere nei Wiuwert. Ea in âld fiskersdoarp oan de râne fan de eardere Middelsee. In besite wurdt brocht oan de grêfkelder (1609) ûnder de Herfoarme Tsjerke. Dêr lizze 4 ieuwenâlde mummys.

Om 12.00 oere is de groep yn it WeidumerHout yn Weidum. De camping/restaurant/hotel is fêstige yn in eardere pleats oan de Swette. Eigner Eddy de Boer jout in rûnlieding troch syn bedriuw en ljochtet it ien en oar neier ta.

Om 12.30 wurdt it middeisiten oanbean troch de gemeente Littenseradiel. Om 14.00 nei it doarp Bears, dêr’t in unike stielen “loftspegeling” fan it eardere Unia-State realisearre is, nei it bedriuw fan Wypke van de Lageweg (14.30 oere).

Wypke is ea mei ien hynder begûn en hat op ’t stuit ien fan de grutste hynstefokbedriuwen fan Europa.

Om 16.00 oere giet de reis nei Wommels, it haadplak fan de gemeente Littenseradiel. Dêr wurdt de middei ôfsletten mei in ûntfangst op it gemeentehûs. De boargemaster jout in presintaasje oer gearwurkingsferbannen mei oare gemeenten. Der is gelegenheid ta diskusje en ta beslút en sûpke en in hapke.

Mei de bus werom nei Grou (likernôch 18.00 oere). Dêr is om 19.30 oere in waarm buffet, folge troch in gesellich muzikaal programma.

Om en de by 22.00 oere slút Bearn Bilker it Bestjoerlik Treffen ôf.

Sneontemoarn 14 oktober.

Nei it moarnsbrochje reizget elk wer ôf nei hûs.

De tariedingskommisje/wurkgroep bestiet út:

Bearn Bilker - Kollumerlân (Fryske Rie), Auke Bijlsma - Boarnsterhim, Germ Gerbrandy - Wymbritseradiel, Piet Vellinga en Coby Visser -Littenseradiel.

Opjeften by Auke Bylsma yn Terherne: aukehetty*chelloPUNTnl
(ferfang it * troch in @ en PUNT troch in . )
Graach ek eksakt oanjaan hokfoar ûnderdiel jo meidogge, mei-ite en eventueel bliuwe te sliepen.